Buhari Ya Umarci Hukumomin Tsaro Dasu Zakulo Waɗanda Suka Kashe Matafiya A Filato
Daga Ibrahim Da’u Mutuwa Dole
Shugaban kasa, Muhammadu Buhari ya umarci hukumomin tsaro da su tabbatar an cafke wadanda suka kashe matafiya a yau Asabar a jihar Filato.
Buhari ya ba da umarnin ne a cikin wata sanarwa da babban mai taimaka masa na musamman kan harkokin yada labarai da hulda da jama’a Garba Shehu ya fitar.
Sanarwar mai taken ‘Fadar Shugaban kasa ta yi Allah wadai da hare -haren‘ yan daba kan matafiya. ’
Shugaban yana cewa; “Kada ku yi kuskure game da umarnin, alkawari na na kare dukkan ‘yan Najeriya yana nan, na umarci hukumomin tsaron mu da su zakulo wadanda suka aikata wannan mummunan kisan gilla kan matafiya marasa laifi kuma su gurfanar da su a gaban shari’a.”
Yayin da yake jajantawa da iyalan wadanda abin ya rutsa da su, Fadar Shugaban kasa ta yi alkawarin ci gaba da yin aiki tare da hukumomin yankin don tabbatar da tsaron rayuka da dukiyoyi.
Sanarwar ta kara da cewa, “Fadar Shugaban kasa ta yi tir da harin da aka kai a kan mutanen akan hanyar su ta dawowa daga taron addini a Bauchi, suna wucewa Jos, Babban Birnin Jihar Filato kuma suna nadamar mutuwar akalla mutane ashirin da biyu tare da jikkata wasu da dama a harin kwanton baunar da aka yi musu.
Views: 14